Nadakpan sa mga personahe sa Argao Municipal Police Station, ubos sa pagpangulo ni PCPT Eden Rex L. Baguio, ang usa ka suspetsado sa kaso sa pagpatay atol sa usa ka hot pursuit operation nga gihimo sa Barangay Lengigon, Argao, Cebu.
Ang pagdakop misunod sa insidente sa pagpamusil nga nahitabo sa gabii sa Oktubre 24, 2025 sa Upper Taloot, Argao, diin napatay ang usa ka lalaki nga truck driver nga nailhan sa alyas “Meno.” Base sa inisyal nga imbestigasyon, ang biktima nag-andam pa lamang nga modrive sa iyang sakyanan sa dihang giduol siya sa usa ka lalaki nga nagsul-ob og itom nga kalo ug puti nga sinina ug gipusil dayon siya, human niini miikyas ang suspetsado sakay sa motorsiklo.
Pinaagi sa paspas nga follow-up investigation ug hot pursuit, nakahimo ang kapulisan sa pag-ila ug pagdakop sa suspetsado nga nailhan sa alyas “Kev,” 35-anyos ug residente sa Argao. Ang suspetsado positibong giila sa usa ka testigo atol sa operasyon.
Nasakmit gikan sa suspetsado ang usa ka pusil, bala, motorsiklo nga gigamit sa krimen, ug ubang ebidensya nga may kalabutan sa insidente. Karon, anaa na sa kustodiya sa kapulisan ang suspetsado samtang giandam ang pormal nga pagsaka sa kaso nga Murder ubos sa Article 248 sa Revised Penal Code.
Gipasalig sa Argao Municipal Police Station ang padayon nilang pagpaningkamot aron makab-ot ang hustisya alang sa biktima ug mapadayon ang kalinaw ug kahapsay sa tibuok lungsod.
Source: Argao MPS
I via Renante Socia Lada