Ang Police Regional Office 7 (PRO7) ubos sa pagpangulo ni Regional Director PBGen Redrico Maranan maoy nakakuha sa pinakataas nga rating sa Monthly Unit Performance Evaluation Rating (UPER) sulod sa pito ka bulan sunod-sunod, gikan Abril hangtod Oktubre 2025, ug nanguna batok sa tanang 17 ka police regional offices sa tibuok nasud.
Kini nga kalampusan nagpakita sa maayong pagdumala, lig-on nga operasyon, ug aktibong pakig-uban sa komunidad sa PRO7, pinaagi sa hustong pagpatuman sa ilang mga plano, programa, ug estratehiya. Sa Oktubre 2025, nakakuha ang PRO7 og 86.422 nga puntos, ang pinakataas sa nasod.
Ang UPER usa ka binulan nga ebalwasyon nga nagtan-aw sa disiplina sa kapulisan, epektibong pagpatuman sa balaod, pagdumala sa mga personnel, administratibong operasyon, ug pakig-uban sa komunidad.
Matod ni PBGen Maranan, ang padayon nga maayong resulta nagpakita sa propesyonalismo, dedikasyon, ug panaghiusa sa tanang miyembro sa PRO7, nga nahimong hulagway ug ehemplo sa maayong serbisyo sa kapulisan sa tibuok nasod.
Nagpadayon ang PRO7 sa ilang tinud-anay nga pag-alagad, propesyonalismo, ug pagpanalipod sa katawhan.
Source: PRO7 PIO
I via Renante Socia Lada