Nadakpan sa kapulisan ang Top 8 Provincial Most Wanted Person sa probinsya sa Bohol tungod sa kasong statutory rape karong Enero 15, 2026 alas 11:00 sa buntag sa Barangay Payao, Duero, Bohol.
Ang pagdakop gihimo sa mga pulis sa Jagna Municipal Police Station ubos sa pagpangulo ni PCPT Winston Magdadaro, uban sa tabang sa Duero Municipal Police Station nga gipangulohan ni PCPT Justeofino M. Hinlayagan.
Ang suspek usa ka 20 anyos nga Pilipino, ulitawo ug walay trabaho, nga residente sa maong barangay. Siya nadakpan pinasikad sa Warrant of Arrest nga gi-isyu sa Regional Trial Court sa Loay, Bohol niadtong Enero 9, 2026, kalabot sa kasong statutory rape.
Karon, ang suspek anaa na sa kustodiya sa Jagna Municipal Police Station alang sa hustong proseso sa balaod.
Matod sa PNP Bohol, kining kalampusan nagpakita sa ilang padayon nga paningkamot sa pagdakop sa mga wanted person ug sa pagpanalipod sa komunidad, ilabi na sa mga mahuyang ug biktima sa krimen.
Klaro usab nga mensahe nga walay labaw sa balaod ug patubagon ang tanang nakasala.
Source: PNP Bohol
I via Renante Socia Lada