Giaprobahan sa Cebu Provincial Board (PB) ang usa ka resolusyon nga nagtugot kang Gobernador Pamela Baricuatro sa pagpirma sa Memorandum of Agreement (MOA) uban sa Probinsya sa Bohol alang sa pagpatuman sa SugBohol Sisterhood Agreement. Ang resolusyon giaprubahan atol sa regular nga sesyon sa Provincial Board kagahapon Hulyo 20.
Sumala sa resolusyon nga gisulat ni PB Member Malcolm Sanchez, tumong sa kasabutan nga mapalig-on ang panagtinabangay sa Cebu ug Bohol sa turismo, komersyo, negosyo, ekonomiya, ug mga proyekto sa imprastraktura.
Gilauman nga makatabang kini sa mas paspas nga kalamboan sa tibuok Central Visayas.
Gikatakda ang opisyal nga pagpirma sa MOA sa Hulyo 31 sa Probinsya sa Bohol. Human niini, magtukod usab og Technical Working Group (TWG) nga maoy motan-aw sa hapsay nga pagpatuman sa kasabutan ug sa mga proyekto nga ilalom niini.
Kabahin sa TWG sila PB Members Stanley Caminero, Lakambini Reluya, Malcolm Sanchez, Nelson Mondigo, Raymond Calderon, ug Sangguniang Panlalawigan Secretary Atty. Pulchra Marie Acevedo.
Ang maong kasabutan nagpadayon sa paningkamot sa Cebu ug Bohol nga mas mapalig-on ang ilang panag-uban, ilabina sa pagpauswag sa ekonomiya, turismo, ug paghiusa sa mga kalamboan sa Central Visayas, subay sa Joint Resolution No. 01-2024 nga gisagop sa duha ka probinsya niadtong Nobyembre 2024.
I via Renante Socia Lada