Gipasidunggan sa Police Regional Office 7 (PRO7) ang mga pulis nga nagpakita og talagsaong serbisyo ug kaisog atol sa flag raising ceremony nga gipangulohan ni Regional Director PBGEN Arnold E. Abad sa Camp Sergio Osmeña Sr., Cebu City kagahapon
Hulyo 20, 2026. Sa maong okasyon, gihatagan usab og espesyal nga pagpasalamat si PBGEN Eduardo M. Paras, Regional Director sa Regional Internal Affairs Service 7, tungod sa iyang mahinungdanong kontribusyon sa Philippine National Police.
Gidawat nila ni PCPT Dennis N. Seragon ug Pat Benigno B. Tiongzon sa Mandaue City Police Office ang Medalya ng Kadakilaan human sa ilang malampusong buy-bust operation sa Barangay Canduman, Mandaue City. Sa operasyon, nadakpan ang usa ka gidudahang drug personality ug nakompiska ang kapin ₱3.1 milyon nga kantidad sa gidudahang shabu.
Samtang, gihatagan og Medalya ng Kagalingan sila PSSg Jose Ahron M. Ortega ug PCpl Michael John S. Agbu sa Consolacion Municipal Police Station tungod sa ilang kaisog sa pagsulbad sa hostage-taking incident sa Barangay Tayud, Consolacion niadtong Hulyo 3, 2026. Bisan og mipusil ang suspetsado ngadto sa mga pulis, ilang napukan ang hulga ug naluwas ang biktima.
Human sa awarding, gihatagan si PBGEN Eduardo M. Paras og Plaque of Recognition ug Token of Appreciation isip pag-ila sa iyang matinud-anong serbisyo ug pagpangulo. Sumala sa PRO7, ang maong seremonya nagpakita sa ilang padayon nga paghatag og pag-ila sa mga pulis nga nagpakita og kaisog, integridad ug dedikasyon sa pag-alagad sa katawhan, subay sa Five-Focused Agenda ni PNP Chief PGEN Jose Melencio C. Nartatez Jr.
I via Renante Socia Lada