Gidayeg sa Presidential Communications Office (PCO) ang Kagamhanang Probinsyal sa Sugbo ubos ni Gobernadora Pamela Baricuatro isip usa sa bag-ong Local Government Units nga milusot ug mipasar sa Freedom of Information (FOI) Guidelines. Si Provincial Information Officer Ainjeliz de la Torre-Orong mao’y nidawat sa pasidungog alang sa gobernador atol sa 2025 Freedom of Information Awards niadtong Nobyembre 28 sa Bellevue Manila, Alabang, Muntinlupa City.
Nalipay ang Sugbo nga maapil sa mga LGU nga nagpakita sa lig-on nga pagpaningkamot sa pag-ila, paghatag ug akses sa impormasyon, ug pagpalig-on sa open governance pinaagi sa padayon nga implementasyon sa FOI Program. Gisiguro niini ang suporta sa katungod sa katawhan nga makadawat ug kasayuran gikan sa gobyerno.
Sa pagsulod pa lang sa buhatan ni Gobernadora Baricuatro niadtong Hunyo 30, 2025, iyang gipagawas ang Executive Order No. 3, nga nagpatuman sa FOI Program sa tanang opisina sa Kapitolyo, lakip ang mga departamento, ospital, special units, ug local special bodies. Nagmando kini nga ang matag opisina magtukod ug FOI Desk nga adunay FOI Receiving Officer aron modawat ug moproseso sa mga request sa impormasyon.
Aron dugang palig-onon ang transparency, nagpagawas usab si Baricuatro og Executive Order No. 37 niadtong Hulyo, nga nagmando sa live streaming sa tanang bidding activities sa Bids and Awards Committee (BAC) pinaagi sa opisyal nga social media page sa probinsya. Apil dinhi ang pre-procurement ug pre-bid conferences, bid openings, ug uban pang miting sa BAC.
Ang regular nga Monday sessions sa Provincial Board, lakip ang deliberasyon sa 2026 budget, gi-livestream na usab aron mas accessible sa katawhan.
Source: Cebu Province PIO
I via Renante Socia Lada