Napuno sa kabalaka ang komunidad sa Argao, Cebu human kaplagan ang usa ka 5-anyos nga batang lalaki nga wala nay kinabuhi sa usa ka creek sa barangay niadtong Miyerkules, Nobyembre 26, 2025.
Ang bata giingong nag-uban sa iyang 8-anyos nga ig-agaw sa pagpanguhag umang sa sapa apan wala na kini mopauli uban niya.
Sumala sa Women and Children Protection Desk sa Argao Police, nagyaw-yaw ang inahan nga nagbalaka sa dihang nakita niyang nag-inusara ang 8-anyos nga ig-agaw ug wala niya kuyoga ang biktima.
Human sa pagpangita uban sa barangay ug mga silingan, ilang nakit-an ang 5-anyos nga naglutaw sa tubig, adunay mga samad sa liog ug dunggan.
Sa imbestigasyon sa kapulisan ug DSWD, miangkon ang 8-anyos nga nagdula sila sa lapok ug nasamdan ang biktima human niya kini hampaka samtang nagkupot siya sa usa ka gamay, hait nga cutter nga gigamit pangbag-us sa dahon sa lubi. Wala kuno tuyoa ang insidente ug misibat siya pauli, gibiyaan ang biktima ug gilabay ang cutter nga karon wala pa makit-i.
Padayon ang imbestigasyon sa Argao Police samtang gi-turn over sa DSWD ang 8-anyos aron ipaubos sa stress debriefing.
Gitambagan usab ang komunidad nga palig-onon ang pagbantay sa mga bata ug ipatuman ang mas hugot nga siguridad aron malikayan ang susamang trahedya.
Source: Argao MPS
I via Renante Socia Lada