Nadakpan ang 21 anyos nga babaye nga store supervisor tungod sa qualified theft human masakpan sa akto sa usa ka tindahan sa Ayala Center Cebu, 3rd Level, sa Barangay Luz, Cebu City sa Marso 14, 2026 mga alas 9:15 sa gabii.
Sumala sa imbestigasyon, nasakpan sa tag-iya sa establisemento ang suspek nga nagdala og ₱8,500 nga kwarta gikan sa daily sales sa tindahan nga wala matala sa opisyal nga sales record sa kompanya.
Giingon sa mga otoridad nga paglapas sa pagsalig sa kompanya ang nahitabong buhat tungod kay supervisor ang posisyon sa suspek.
Human sa insidente, gidakop dayon ang suspek pinaagi sa citizen’s arrest ug gidala sa Mabolo Police Station 4 alang sa hustong dokumentasyon ug pagproseso sa kaso.
Ang Cebu City Police Office ubos sa liderato ni PCOL. George V. Ylanan, Officer-in-Charge, nagpahinumdom sa publiko nga ang bisan kinsa nga masakpan sa akto sa pagbuhat og krimen mahimong dakpon pinaagi sa citizen’s arrest sumala sa balaod.
Giduso usab sa kapulisan ang mga negosyo nga magpabiling alerto ug mabinantayon aron malikayan ang susamang insidente.
Source: CCPO
I via Renante Socia Lada