Opisyal nang gitangtang ang state of calamity sa tibuok Probinsya sa Cebu nga unang gideklarar tungod sa linog niadtong Septiyembre 30 ug Bagyong Tino niadtong Nobyembre 4 sa miaging tuig.
Ang maong desisyon giaprobahan sa Cebu Provincial Board atol sa ilang regular nga sesyon kagahapon Lunes, Mayo 4, diin unanimously gi-aprubahan ang resolusyon nga gisumiter ni Board Member Lakambini Reluya aron tangtangon na ang state of calamity.
Gihimo ni Reluya ang resolusyon human marekomendar sa Provincial Disaster Risk Reduction and Management Council (PDRRMC), nga gipangulohan ni Governor Pamela Baricuatro, nga andam na ang probinsya nga mohawa sa emergency status.
Sumala sa PDRRMC, mibalik na sa normal ang kahimtang sa kadaghanan sa mga lugar sa Cebu, ug mahimo na nga mopadayon sa recovery ug rehabilitation phase imbis emergency response.
Base sa ilang resolusyon, nahuman na ang mga emergency response, kadaghanan sa evacuation centers gisira na, ug nibalik na usab sa normal ang supply sa mga batakang serbisyo ug mga palaliton.
Bisan pa niini, giingon sa mga opisyal nga nagpadayon gihapon ang rehabilitation sa 19 ka lugar nga grabeng naapektuhan, lakip ang Madridejos, Sta. Fe, Bantayan, Daanbantayan, Medellin, San Remigio, Tabuelan, Bogo City, Tabogon, Borbon, Sogod, Danao City, Compostela, Liloan, Consolacion, Mandaue City, Talisay City, Balamban ug Asturias.
Girekomendar usab nga bisan og tangtangon na ang state of calamity sa tibuok probinsya, ang mga lokal nga lider sa labing naapektuhang lugar mahimo gihapong magdeklarar og localized state of calamity kung gikinahanglan.
Mahinumduman nga gideklarar ang state of calamity tungod sa dakong kadaot nga gidala sa linog ug Bagyong Tino sa imprastraktura, panginabuhian ug komunidad sa Cebu.
Gipahimangno usab sa resolusyon nga ang tanang ahensya sa gobyerno magpadayon sa pagpatuman sa mga programa alang sa recovery, rehabilitation ug disaster preparedness aron masiguro ang kalamboan ug kahandaan sa umaabot nga kalamidad.
Source: Cebu Province PIO
I via Renante Socia Lada