Nag-awhag si Gobernadora Pamela Baricuatro sa tanang Cebuanos nga magpakita og suporta ug kooperasyon samtang nangandam ang Cebu sa pag-host sa 48th ASEAN Leaders’ Summit karong Mayo 7–8.
Matod sa gobernadora, dako og ikatabang sa ekonomiya sa Cebu ang maong kalihokan ilabi na sa sektor sa trade ug turismo tungod sa mas dako nga exposure sa international nga komunidad ug posibilidad sa mga pamuhunan.
Gipasabot niya nga bisan adunay gamay nga kahasol o adjustments sa pipila ka adlaw, kini makahatag og dugayng benepisyo sa probinsya.
Gihulagway usab ni Baricuatro nga makasaysayanon ang maong summit tungod kay kini ang unang higayon nga ipahigayon ang ASEAN Leaders’ Summit gawas sa Metro Manila.
Gilauman nga motambong ang mga lider sa 11 ka nasud nga miyembro sa ASEAN sama sa Brunei, Cambodia, Indonesia, Laos, Malaysia, Myanmar, Pilipinas, Singapore, Thailand, Timor-Leste ug Vietnam aron hisgutan ang mga isyu ug kooperasyon sa rehiyon.
May kalabutan niini, gi-awhag sa gobernador ang publiko, labi na ang mga naa sa Mactan area, nga magplano daan sa ilang byahe tungod sa posibleng road closures alang sa seguridad sa mga delegado.
Gihangyo usab niya ang mga Cebuanos nga magpakita og pasensya, kainit sa pagdawat ug garbo isip co-host sa maong importante nga kalihokan.
Dugang pa, gi-engganyo niya ang tanan nga magpadayon sa kalimpyo ug ipakita ang maayong pag-abiabi sa mga bisita pinaagi sa matinahuron ug mahigalaong pakig-istorya.
Gipasalig sa gobernador nga andam na ang seguridad, diin kapin sa 10,000 ka security personnel ang gipakatap aron masiguro ang kaluwasan sa tanang delegado ug partisipante sa summit.
Source: Cebu Province PIO
I via Renante Socia Lada