Gipunting ni Gobernador Darel Dexter T. Uy ang kahinungdanon sa panaghiusa ug lig-on nga edukasyon isip pundasyon sa kauswagan sa Zamboanga del Norte atol sa flag-raising ceremony sa Provincial Capitol Grounds.
Sa iyang mensahe, nagpasalamat ang gobernador sa padayon nga panalangin nga nadawat sa probinsya bisan sa mga global nga hagit, ug giingong ang maong mga pagsulay angay gamiton isip inspirasyon sa pagpadayon sa kalamboan.
Gipasidaan usab ni Gov. Uy ang epekto sa nagpadayon nga tensyon sa Middle East, nga aniya nakaapekto sa panginabuhi ug ekonomiya sa daghang lugar. Gipasiugda niya nga ang kalinaw ug kooperasyon mao ang angay nga tubag sa ingon nga mga krisis.
Bisan pa niini, gipasalig sa gobernador nga magpadayon ang probinsyal nga gobyerno sa pagpanalipod sa interes sa katawhan ug sa pagpalambo sa mga programa nga makatabang sa ilang kahimtang.
Gihighlight ni Uy nga ang kakulang sa edukasyon ug ubos nga literacy rate nagpabiling dakong hagit sa probinsya. Tungod niini, gipakusgan ang pakigtambayayong sa Department of Education aron mapaayo ang kalidad sa edukasyon ug mapataas ang kahibalo sa mga estudyante.(IKEN B. GULLEM)
Source: Zamboanga del Norte Provincial News Network