Segon sa Cebu City PIO nga nibisita sa buhatan ni Acting Mayor Raymond Alvin Garcia ang mga sakop sa National Meat Inspection Service (NMIS) Central Office sa nakalabay na adlaw, Septiyembre 4, 2024.
Ang mga bisita mao sila si Dr. Ma. Theressa Magdaraog, labaw sa Central Office Certification Committee (COCC); Dr. Venus Garcia sa Accreditation and Registration Division (ARD); Mr. Michael Monterey sa Plant Operation Standard and Monitoring Division (POSMD); Dr. Precious Emerald Licatan sa Meat Standard Development and Consumer Protection Division (MSDCPD); ug si Ms. Marilou N. De Leon. Kauban nila si NMIS Regional Technical Director Dr. Alvin A. Leal; Dr. Alice Utlang, ang labaw sa Cebu City Department of Veterinary Medicine and Fisheries (DVMF); ug pipila sab ka mga sakop sa DVMF.
Atol sa pagbisita, gipapahibawo sab sa mga opisyal sa NMIS nga nagpahigayon sila og pagsuta sa Cebu City Meat Inspection System, diin tumong niini nga mahibaw-an kung kaya ba sa siyudad nga maoy mokupot sa nalatid nga mga katungdanan sa NMIS.
Kabahin niini, gibisita sab sa NMIS ang mga accredited ug dili accredited nga mga ihawan, apil sab ang kamerkadohan sa siyudad, aron tan-awon giunsa ang pagpatuman ang meat inspection sa kamerkadohan.
Sa iyang bahin, nanghinaot si Acting Mayor Garcia nga positibo ang resulta sa ilang gipahigayon nga verification aron ma certify na sa NMIS ang dakbayan sa Sugbo. (Renante Socia Lada)
(Source: Cebu City PIO)