Magpahigayon og libre nga cleft surgery medical mission ang Rotary Club of Cebu Port Centre kauban ang Rotaplast International ug ang Cebu City Government karong Marso 2026. Kini kabahin sa 21st Rotaplast International Cebu Medical Mission nga nagtumong sa pagtabang sa mga bata ug indibidwal nga adunay cleft lip ug cleft palate pinaagi sa libre nga corrective surgeries.
Sumala sa mga tig-organisar, ang maong misyon dili lamang maghatag og libre nga operasyon kondili apil usab ang libre nga transportasyon, pagkaon, ug akomodasyon alang sa mga mapiling benepisyaryo. Tumong niini nga mapagaan ang gasto sa mga pamilya ug mahatagan og bag-ong paglaum ang mga batang nanginahanglan og operasyon.
Ang pre-clinic o screening ug registration ipahigayon sa Marso 11, 2026 sugod alas 7:00 sa buntag sa 5th Floor sa Adventist Hospital Cebu sa San Nicolas, Cebu City. Importante nga motambong ang mga pasyente ug ilang ginikanan o kauban aron masuta kung kwalipikado alang sa operasyon.
Gidasig ang tanang pamilya nga adunay sakop nga may cleft condition nga mopahimulos niini nga kahigayunan. Ang pre-clinic magsilbing unang lakang aron ma-evaluate sa mga doktor ang kahimtang sa pasyente ug mahibaloan ang angay nga pamaagi sa pagtambal.
Alang sa dugang kasayuran, mahimong kontakon si Pres. Walter Ong sa 0917-650-0300, Fe Escaño sa 0932-874-4668, ug Star Bernabe sa 0918-261-7011.
Giawhag usab ang publiko nga ipaambit ang maong impormasyon aron mas daghang pamilya ang matabangan ug makabenepisyo sa libre nga medical mission.
I via Renante Socia Lada