Ang Lapu-Lapu City Disaster Risk Reduction Management Office pinaagi sa ilang pangulo na si Nagiel Bañacia nagpagawas og update kalabot sa duha ka sunog nga miigo kagahapon sa buntag, Mayo 30, 2025, sa managlahing lugar sa dakbayan sa Lapu-Lapu.
Ang unang sunog nahitabo sa Sitio Iba, Barangay Basak, diin 19 ka balay ang totally damaged ug 3 ang partially damaged. Ang insidente nadawat sa Nerve Command Center alas 9:47 sa buntag. Gibana-bana nga 25 ka pamilya o 170 ka individual ang naapektuhan, kadaghanan kanila mga boarders ug sharers nga nagtrabaho sa Cebu Light Industrial Park. Ang mga biktima giluwas ug temporaryong gipahimutang sa Basak Gym, nga nagsilbing evacuation center.
Wala pa makabawi ang mga otoridad, dihang mibuto ang ikaduhang sunog sa Sitio Lubi, Barangay Canjulao. Nadawat ang alarm alas 10:02 sa buntag, diin 22 ka balay ang totally damaged, 4 ang partially damaged, ug naapektuhan ang 36 ka pamilya o 181 ka individual. Ang sunog misangpot usab sa pagkaguba sa 6 ka boarding houses ug 2 ka partially damaged nga rentahan.
Tungod sa kalapad sa sunog, gisaka kini sa 4th alarm alas 10:47 AM, ug nangayo og tabang ang Lapu-Lapu City sa mga kasikbit nga fire brigades gikan sa Cordova, Mandaue, ug Cebu City, kay halos tanang fire trucks sa Lapu-Lapu anaa pa sa insidente sa Basak. Natabang ang sunog sa Canjulao pasado alas 11:19 sa buntag.
Matod sa Disaster Risk Operations Monitoring and Information Center (DROMIC), gisugdan na ang paghatag sa tabang sa mga biktima alas 12:30 sa udto. Gisugdan dayon ang pagpakaon sa mga biktima samtang sila nagpalista sa DROMIC team.
Gipanghatag dayon ang relief goods, lakip ang pagkaon ug non-food items, samtang naghulat sa final listing sa mga biktima. Giandam usab ang evacuation areas sa Basak Gym ug Canjulao Elementary School.
Ang mga bombero ug fire volunteers nga nitabang pagpawong sa kayo gihatagan usab og pagkaon isip pagpasalamat sa ilang serbisyo.
Padayon pa nga gi-imbestigar usab ang hinungdan sa sunog ug pila ang danyos niini.
Source: Nagiel Bañacia
I via Renante Socia Lada