Pormal nga gideklarar ni Mayor Raymond Alvin Garcia ang pagbukas sa ika-45 nga Sinulog Festival human sa misa sa Basilica del Sto. Niño karong hapon, Enero 10, 2025.
Pagkahuman sa misa novena nga nagsugod alas 2:30 sa hapon, gisunod ang parada ug sayaw sa tradisyonal nga Sinulog. Ang kalihokan nagsugod sa Pilgrim Center sa Basilica ug natapos sa Cebu City Sports Center.
Si Mayor Garcia ug ang iyang kapikas nga si Kate, kauban ang mga opisyal sa Cebu City, mga konsehal, ug department heads sa City Hall, nangulo sa selebrasyon. Nitambong usab si Vice Mayor Dondon Hontiveros ug ang iyang pamilya, uban sa mga konsehal sama nila Pastor “Jun” Alcover, Jaypee Labella, Joel Garganera, ug uban pa. Ang Sinulog Foundation Inc. Executive Director Elmer “Jojo” Labella ug SK President Rhea Mae Jakosalem misalmot usab sa kalihokan.
Sa iyang pagwali, si Msgr. Roberto “Boy” Alesna mipahinumdom sa mga magtutuo nga ang paglaom maoy yawi sa kinabuhi. Sa tema nga “Sto. Niño: Hope of the Pilgrim Church,” gihisgutan niya ang pagkaimportante ni Señor Sto. Niño isip angkla sa paglaom ug giya sa kinabuhi sa mga Kristiyano.
Gidasig usab niya ang mga magtutuo nga iampo ang mga lider sa gobyerno aron magmalampuson ug matinud-anon sa ilang pagserbisyo sa katawhang Sugboanon.
Ang pag-abli sa Sinulog Festival nagtimaan sa pagsugod sa usa ka semana nga masadya nga mga kalihokan alang sa pagpasidungog ni Señor Sto. Niño. (Renante Socia Lada)
(Source: Cebu City PIO)