Sunud-sunod nga reklamo bahin sa iligal nga sugal ang nadawat sa Cebu City Police Office (CCPO) ilawom sa liderato ni Police Colonel Antonietto Cañete, hinungdan nga nihimo kini og operasyon sa nagkadaiyang barangay aron mapugngan ang kalapasan.
Gipangunahan sa Abellana Police Station 2 ang usa ka anti-illegal gambling operation sa F. Ramos Street, Barangay Cogon Ramos, nga miresulta sa pagdakop ni Marvin Lastimado, 28 anyos, taga Alaska Proper, Barangay Mambaling. Nakakuha og betting money nga P150, apan ang iyang mga kauban nakasibat.
Didto sa Sitio San Niño, Barangay Kamagayan, nadakpan ang duha ka suspek nga sila Vincent Tagalog Nebrida, 22 anyos, ug Christian Mission Balaba, 26 anyos, pareho residente sa maong lugar.
Lain duha ka sugarol ang nasikop sa Sitio Bahaw, Barangay T. Padilla. Mao kini sila Jerry Managbanag Medalle, 60 anyos, ug Elvin Tagalog Galinggaling, 37 anyos.
Ang maong mga operasyon gipahigayon isip tubag sa reklamo batok sa kalihukan sa iligal nga hantak, nga madalas mahitabo matag gabii. Padayon ang mga kapulisan sa pagpahinumdom sa katawhan nga bawal ang bisan unsang matang sa sugal, ilabi na kung kini makaguba sa kalinaw ug kahapsay sa komunidad. (Renante Socia Lada)
(Source: CCPO)