Dul-an sa 1,400 ka mga residente gikan sa pito ka bukirang barangay sa dakbayan sa Sugbo ang nipailawom sa orientation niadtong Disyembre 7, 2024, aron mahatagan og livelihood assistance gikan sa lokal nga kagamhanan sa Siyudad sa Sugbo.
Ang mga barangay nga naapil mao ang Malubog, Tabunan, Tagba-o, Pung-ol Sibugay, Bonbon, Buot, ug Babag. Kada barangay adunay 200 ka mga benepisyaryo nga nakadawat og P4,000 nga puhonan alang sa ginagmay nga negosyo.
Sumala ni Mayor Raymond Alvin Garcia, nga gipasiugda niya ang livelihood assistance program tungod kay nakita niya nga kini usa sa mga wala kaayo napatuman sa niaging mga administrasyon.
“Dako og ikatabang ang maong kantidad isip dugang puhonan alang sa ginagmay nga negosyo aron mosaka usab ang kita sa mga tawo matag adlaw,” matud sa mayor.
Mga Dugang Programa Sugod Enero 2025
Gipahibawo usab ni Mayor Garcia nga:
Iyang ibalik ang libre nga tambal alang sa mga residente nga adunay gimintinar nga medikasyon. Ang Sinulog Grand Parade ibalik sa naandang lugar aron mapadayon ang tradisyon sa dakbayan.
Ang maong mga inisyatiba nagpakita sa tinguha sa lokal nga kagamhanan nga masuportahan ang mga panginabuhian sa katawhan ug mapalambo ang kalidad sa ilang pangkinabuhi. (Renante Socia Lada)
(Source: Cebu City PIO)