Gipahibawo ni Gobernador Gwen Garcia atol sa year-end general assembly ug Christmas party sa League of Municipalities of the Philippines (LMP) Cebu Chapter nga matag mayor nga nitambong nakadawat og P5 milyones alang sa mga proyekto sa imprastruktura sa ilang lokal nga panggamhanan (LGU).
Ang maong kalihokan gipahigayon sa Radisson Blu Hotel, Dakbayan sa Sugbo, niadtong Disyembre 6, 2024 diin nitambong ang 43 sa 44 ka municipal mayors ug 4 sa 6 ka component city mayors. Sa kinatibuk-an, P235 milyones ang ipang-apod-apod sa mga LGU aron suportahan ang mga proyekto sa imprastruktura sa probinsya sa Sugbo.
Matod ni Mayor Sun Shimura, LMP Cebu president ug mayor sa Daanbantayan, ang padayon nga suporta sa Kapitolyo dako kaayo og gikatabang sa kalamboan sa matag lungsod ug siyudad. “Ang maong mga programa naghatag ug dugang oportunidad sa mga katawhan aron mas mapadayon ang ilang kaharuhay,” matud niya.
Nagpakita usab sa maong kalihokan ang dagkong mga opisyal sa nasud ug probinsya:
• Senador Bong Go
• Senador Francis “Tol” Tolentino
• Deputy Speaker Camille Villar
• Kanhi Senador Bam Aquino
• Kanhi DILG Secretary Benhur Abalos Jr.
• Lakip usab sila Third District Congressman Pablo John “PJ” Garcia, 6th District
• Board Member Glenn Anthony Soco,
• Cebu City Mayor Raymond Garcia, ug Ako Bisaya Partylist second nominee Carissa Garcia.
Ang maong hinabang alang sa imprastruktura nagpakita sa tinguha sa Kapitolyo nga masuportahan ang lokal nga panggamhanan sa probinsya aron mapadayon ang paglambo ug mapadayon ang maayong serbisyo alang sa mga Sugboanon. (Renante Socia Lada)
(Source: Cebu Provincial Capitol PIO)