Usa ka 60-anyos nga lalaki ang patay human gitigbas sa iyang silingan sa Barangay Catmondaan, Catmon, Cebu, niadtong Lunes, Marso 3, 2025, pasado alas 5 sa hapon.
Ang biktima nailhan nga si Celso Subang, minyo, samtang ang suspek mao si Peter Colis, 40-anyos, nga pulos residente sa maong dapit.
Sumala sa inisyal nga imbestigasyon sa Catmon Police Station, personal nga panagbangi ang hinungdan sa insidente. Sa wala damha, misangpot kini sa madugoon nga panagbangi nga misangpot sa pagkamatay ni Subang.
Dali gidala sa mga kapulisan ang suspek ngadto sa Catmon Municipal Police Station alang sa dugang imbestigasyon. Sa pagkakaron, padayon pang gisuta ang tinuod nga hinungdan sa maong krimen.
Samtang nagpadayon ang imbestigasyon, gidasig sa kapulisan ang mga residente sa pagpabilin nga malinawon ug pagreport dayon sa mga otoridad kung aduna silay kasayuran nga makatabang sa kaso. (Renante Socia Lada)