Gipangulohan sa Police Regional Office 7 (PRO7) ang usa ka espesyal nga seremonya aron pasidunggan ang tulo ka pulis nga nahuman na sa ilang serbisyo ug nakatampo sa dugay nga panahon sa Philippine National Police (PNP). Ang kalihukan gihimo sa PRO7 Headquarters niadtong Biyernes, Setyembre 19, ubos sa programa nga “Salamat Kapatid.”
Gipasidunggan sila Police Lieutenant Gerson Duba Rosende gikan sa Lapu-Lapu City Police Office, Police Executive Master Sergeant Edrudd Mahusay Estonilo sa PRO7 Regional Headquarters, ug Police Staff Sergeant Ulysses Restauro Reales gikan usab sa Lapu-Lapu City Police Office.
Matod ni PRO7 Regional Director PBGEN Redrico A. Maranan, dako ang papel sa mga pulis nga sama nila sa pagpadayon sa misyon sa PNP tungod sa ilang kaisog, pagkamatinud-anon, ug sakripisyo alang sa katawhan.
Si PLt Rosende nagserbisyo sulod sa 29 ka tuig, 9 ka bulan ug 25 ka adlaw; si PEMS Estonilo sulod sa 20 ka tuig, 1 ka bulan ug 28 ka adlaw; ug si PSSg Reales sulod sa 26 ka tuig, 11 ka bulan ug 13 ka adlaw. Gihatagan sila og Medalya ng Paglilingkod, plaque of recognition, cash incentives, ug mga pahalipay lakip na ang ATM replica alang sa ilang pension ug leave credits.
Gihatagan usab og bulak ang ilang mga asawa isip pagpasalamat sa suporta sa ilang pamilya. Sa ilang mensahe, gipakita sa mga retiradong pulis ang positibo nga mga pahimangno ug pagpangandam alang sa bag-ong yugto sa ilang kinabuhi. Natapos ang programa pinaagi sa pass-in-review nga nagpakita sa ilang respeto ug pagpasidungog sa kasundalohan.
Ang PRO7 nagpadayon sa pag-ila ug pagpasidungog sa mga pulis nga nag-alagad sa tibuok kinabuhi alang sa katawhan, aron ang ilang serbisyo ug sakripisyo dili malimtan.
Source: PRO7- PIO
I via Renante Socia Lada