Usa ka Mazda pick-up nga paingon unta sa amihanang bahin sa Sugbo aron maghatod og mga relief goods alang sa mga biktima sa linog, naaksidente didto sa Trans Central Highway, Barangay Cansomoroy, Balamban, alas 1:44 sa hapon, Oktubre 5, 2025.
Sumala sa inisyal nga imbestigasyon sa Balamban Police Station, ang Mazda pick-up nga gimaneho ni Noie Cadilig Lendio, 41 anyos, taga Barangay Tisa, Cebu City, nawad-an og preno, hinungdan nga mibangga kini sa usa ka Mitsubishi Xpander nga gimaneho ni Ricky Ricafort Bustamente, 54 anyos, taga Barangay Aliwanay, Balamban. Tungod sa kakusog sa impact, nabalitok ang Xpander, samtang ang Mazda milahos sa gutter sa kilid sa kalsada.
Gipangdala dayon sa tambalanan ang onse (11) ka tawo nga naangol sa insidente, lakip ang duha ka drayber. Apil sa mga nasamdan ang mga sakay sa Mazda nga sila Brayden Lendio (19), Marilou Lendio (53), Jushua (16), Sharon Lendio (41), Dastiny (12) nga tanan molupyo sa Barangay Guadalupe, Cebu City. Naangol usab sila Vilma Maloloy-on (53), Viam Nataniel (14), Jimmy Rabi, tanan taga Mandaue City, ug si Liam Kane (10) nga taga Lapu-Lapu City.
Nasayran nga ang Mazda nga pick-up nagkargag mga pagkaon, tubig, ug materyales nga ihatod unta sa mga biktima sa linog sa amihanang Cebu. Tungod sa disgrasya, napugos nga mapalong ang biyahe sa hinabang samtang gipang-ayo pa ang mga naangol.
Matod ni PCpl. Jun Carlo Dy, imbestigador sa kaso, padayon pang gipangtambalanan sa ospital ang drayber nga si Lendio. Kon makarecover na siya ug tugotan sa doktor, dad-on kini sa Balamban Police Station aron maimbestigahan ug mahan-ay ang pormal nga kaso. Samtang, padayon ang mga awtoridad sa pagsusi sa tinuod nga hinungdan sa pagkawala sa preno sa sakyanan.
I via Renante Socia Lada