Nahunong ang pagka aktibong desk officer sa Mandaue City Police Office (MCPO) sa usa ka pulis human nasikop sa hiniusang buy-bust operasyon sa kapulisan.
Didto kini sa C. Padilla Street, Barangay Mambaling sa syudad sa Sugbo, pasado alas 11:00 sa buntag, Abril 6, 2025.
Ang suspetsado naila nga si PSSg Niesel Artizo Pescante, alyas “Mr. Nice”, 33 anyos, taga Liloan, Sugbo, sakop sa MCPO, ug miyembro sa PNP sukad 2012, sa operasyon, nadakpan siya samtang nagpayuhot og ginadiling drugas.
Nasakmit gikan sa suspek ang duha ka medium ug duha ka large-sized nga pakete sa gituohang shabu nga mitimbang og 60 gramos, nga nagkantidad og P408,000. Nakuha usab ang iyang service firearm nga may 14 ka bala, ug ang buy-bust money.
Ang operasyon gilusad sa panaghiusa sa RPDEU7, Stations 6 ug 11 sa CCPO, CDEU, ug PDEG-SOU7. Gitumbok si Mr. Nice isip target human sa dugay nga surveillance sa kapulisan nga nalambigit sa ilegal nga negosyo sa ginadiling drugas.
Sa pagkakaron nagpadayon pa ang imbestigasyon aron masuta kung kinsa pa ang mga kaubanan sa suspetsado.
Ang suspetsado mag atubang og kasong kriminal ug administratiba, nga posibleng moresulta sa iyang pagka-dismiss sa serbisyo.
Gihuwat pa usab ang opisyal nga pamahayag sa MCPO kalabot sa ilang sakop nga nadakpan nga nagpayuhot og ginadiling drugas.
I via Renante Socia Lada