Kapatagan, Lanao del Norte – Gibanabanang mokabat sa ₱800,000 nga kantidad sa giingong smuggled nga sigarilyo ang nasakmit sa mga personahe sa 2nd Provincial Mobile Force Company (PMFC) sa Lanao del Norte Police Provincial Office atol sa gipahigayong checkpoint operation sa Brgy. Bansarvil 1, Kapatagan, Lanao del Norte, mga alas 6:00 sa buntag niadtong Abril 6, 2025.
Sa gipahigayong checkpoint sa 4th Maneuvering Platoon, nahunong ang usa ka Mitsubishi Versa Van nga may plakang WDW 677. Sa inisyal nga inspeksyon, namatikdan sa mga operatiba ang pipila ka karton sa sigarilyo nga nilili sa ilawom sa tarpaulin sa likod nga bahin sa sakyanan. Gi-impound dayon ang sakyanan alang sa makuting inspeksyon.
Ang sakyanan gisakyan sa tulo ka mga tawo gikan sa Zamboanga City. Sa pakig-alayon sa mga opisyal sa barangay nga si Hon. Roldan E. Sebial ug Hon. Nicolas M. Braga, ang imbestigasyon ug imbentaryo gihimo sa ilang atubangan.
Lakip sa mga nakumpiska mao ang:
– 18 ka sako sa Astro puti nga sigarilyo, nga adunay 50 ka ream kada sako
– 2 ka sako sa New Berlin red sigarilyo, 50 reams matag sako
Sa kinatibuk-an, moabot ngadto sa 1,000 ka ream sa giingong smuggled nga sigarilyo ang nasakmit nga adunay gibanabanang market value nga ₱800,000.
Ang mga dinakpan ug ang mga nakumpiska nga kontrabando gidala sa Kapatagan Municipal Police Station alang sa katugbang nga dokumentasyon. Ang mga sigarilyo ug ang gigamit nga sakyanan gikatakdang i-turnover sa Bureau of Customs alang sa tukmang disposasyon.