Napusasan sa kapulisan ang usa ka DepEd Administrative Assistant human nakuhaan og ginadiling drugas sa iyang position. Ang buy-bust operations gipahigayon niadtong niaging gabii, Pebrero 26, 2023, didto sa Purok 7, Barangay Poblacion, Lungsod sa Aloguinsan, Probinsiya sa Sugbo.
Giila ang suspetsado nga mao si Ronel Aliling Restauro, 37 anyos ang panuigon, residenti sa Purok 3, Barangay Poblacion, sa mao ra nga lungsod. Ang mga sakop sa Aloguinsan Police Station pinanguluhan sa ilang hepe nga mao si Police Captain Roberto Barnido Jr. maoy nangulo sa maong operations nga ni resulta sa pagka sikop sa suspetsado.
Mga pinakiting shabu ang nakuha sa position ni Restauro ug kwarta nga gituhuang halin sa iyang pagpamaligya sa ginadiling drugas.
Ang kapulisan sa maong lungsod nilusad sa ilang anti-illegal drug operations basi kini sa intelligence monitoring diin nitumaw nga si Restauro nalambigit sa pagpamaligya og ginadiling drugas.
Sa pagkakaron ana pa sa kustudiya sa Aloguinsan Police Station ang dinakpan ug giandam na usab ang Kasong kalapasan sa RA 9165 ang ipasaka batok sa suspetsado. (Renante Lada, photo courtesy of Aloguinsan Police Station)