Wala na kabalik nga buhi ang usa ka reporter sa Sugbo human nadasmagan ang ilang gisakyan nga motorsiklo.
Didto kini nahitabo sa Crossing sa Siapo, Brgy. Tampi, San Jose, Negros Oriental, niadtong niaging hapon, Marso 12, 2023.
Ang biktima giila sa San Jose Police Station nga mao si Pegeen Maisie Manlangit Sararaña, hingkod, residenti sa Barangay Tuyom, Dakbayan sa Carcar, reporter sa CDN Digital ug sa Inquirer.
Naila usab ang suspetsado nga driver sa usa ka Isuzu truck nga mao si Nielric Tano Gaso, 27 anyos ang panuigon, menyo, nagpuyo sa Brgy. Silab, Lungsod sa Amlan, Negros Oriental.
Sa gihimo nga imbestigasyon ni PCAPT Carlo Desano sa San Jose Police Station, nasayran nga nihunong sa naasoy nga lugar ang biktima uban sa iyang hinigugma sa dihang gidasmagan sa truck ang gisakyan nga motorsiklo.
Sa kakusog sa impact nalagpot ang mga biktima diin na grabihan si Sararaña.
Gisuwayan pa unta pag dala sa tambalanan apan nabugtuan kini sa kinabuhi kagahapong adlawa, Marso 13,2023.
Mahinumduman nga nag cover sa Pamplona massacre ang naasoy nga tigbalita nga gikamatay ni Negros Oriental Governor Roel Degamo ug laing walo ka mga tawo.
Sa pagkakaron padayong gitanggong ang suspetsado nga driver samtang giandam ang tukmang kaso. (Renante Lada, photo courtesy of San Jose Police Station)