Gidakop sa kapulisan sa Police Regional Office 7 (PRO7) ang usa ka lalaki nga giila isip Regional Most Wanted Person Rank No. 7 sa Tuburan, Cebu, niadtong Setyembre 16, 2025, tungod sa kaso nga duha ka ihap sa rape.
Ang pag-serve sa warrant of arrest gihimo mga alas-1 sa hapon sa Barangay Siotes, Tuburan, Cebu sa mga operatiba sa Tuburan Municipal Police Station ubos sa Cebu Police Provincial Office. Ang mando sa pagsikop giluwat ni Judge Judilyn Hugo Tapia Menchavez sa RTC Branch 8, Toledo City, Cebu, niadtong Mayo 17, 2025. Walay girekomendar nga piyansa alang sa kaso.
Karon, ang akusado gidetener sa custodial facility sa Tuburan MPS ug ipresentar sa korte. Ubos sa balaod sa Pilipinas, ang kaso sa rape silotan og reclusion perpetua o hangtod 40 ka tuig nga pagkabilanggo.
Gipasidunggan ni PBGen Redrico A. Maranan, Regional Director sa PRO7, ang paspas nga aksyon sa Tuburan Police.
Gidugang pa niya nga magpadayon ang kapulisan sa Central Visayas sa pagpangita ug pagsikop sa mga high-value targets aron masiguro nga ang mga kriminal atubangon gyud ang balaod.
Gihangyo usab sa PRO7 ang publiko nga magpabilin nga mabinantayon ug motabang sa kapulisan pinaagi sa pagreport sa mga wanted persons ug uban pang kalihokan kriminal aron mapalig-on ang kalinaw ug seguridad sa rehiyon.
Source: PRO7- PIO
I via Renante Socia Lada