Nagmalampuson ang gihimo nga buy-bust operation sa mga sakop sa Cebu City Police Office batok sa usa ka Regional High Value Individual.
Sabado sa gabii, Marso 18, 2023, gipahigayon ang buy-bust operation didto sa Sitio Lahing-Lahing, Barangay Mabolo, Siyudad sa Sugbo.
Ang nasikop giila sa mga sakop sa Cebu City Drug Enforcement Unit nga mao si June Alber Ylaya, 23 anyos ang panuigon, alyas Pangit, nga residenti sa Barangay Carreta sa maong ra nga Siyudad.
Nakuha sa iyang position ang mga binultong shabu nga adunay timbang nga 470 grams ug street value nga P3.1 Milyon.
Si Ylaya matud pa nalambigit usab kini og mga kaso sa pagpatay sa Dakbayan sa Sugbo basi sa nahipos nga kasayuran sa kapulisan. Nasayran usab nga ang source sa ginadiling drugas sa dinakpan naila nga usa ka May-May napriso sa Cebu City Jail.
Sa pagkakaron gihimo pa ang dugang imbestigasyon may labot sa dinakpan ug gi andam na usab ang tukmang kaso niini. (Renante Lada, photo courtesy of Cebu City Police Office)