Cebu City – Gimando ni Cebu City Acting Mayor Michael Rama nga ipahunong ang clinical trials sa WestVac ngadto sa mga residente sa Syudad sa Sugbo.
Giawhag ni Rama, Oktubre 18, 2021, ang grupo nga nagpaluyo sa clinical trial kinahanglang mokuha ug clearance sa syudad;
Kinahanglan sab nga dunay pinirmahan nga memorandum of agreement.
Sayo niini, gipadayag ni Konsehal David Tumulak ang iyang concerns labot sa presensya sa Chinese Pharmaceutical company nga giingong mipahigayon ug clinical trials alang sa vaccine batok sa Covid-19.
Matod ni Tumulak nga way pagtugot gikan sa city government nga mopahigayon ug clinical trials ang mga representante sa kompaniya nga WestVac Biopharma R&D gikan sa Sichuan, nasud sa China.
Sa privilege speech ni Tumulak atol sa sesyon sa konseho sa miaging semana, iyang gipanawagan ang Food and Drug Administration (FDA), Department of Health (DOH), ug ang City Health Department nga ipa imbestiga ang maong hitabo.
“We received information that some individuals in Cebu City’s coastal villages underwent a clinical trial and were given a pay (of ₱ 2,500 to ₱ 5,000 each) whenever they passed the screening,” pahibaw sa konsehal.
Gipadayag ni Tumulak ang iyang kahadlok nga ang clinical trials maka expose sa mga residente sa ka kuyaw tungod kay wa mailhi sa publiko ang maong vaccine.
Dunay pagtugot sa DOH Central Office
Giklaro ni Dr. Jaime Bernadas, director sa DOH Central Visayas nga dunay pagtugot gikan sa DOH Central Office alang sa pagpahigayon ug clinical trials sa Sugbo, apan wa kini mo detalye kanus-a gitugtan ug kung duna bay gipahigayon sa ubang lugar sa nasud labot sa trial.
Nasayran ni Tumulak nga ang WestVac Biopharma R&D misgugod sa ilang phase 1 sa clinical trial sa China pagka Hunyo 21 ug anaa na kini karon sa phase 3.
Duna kini 40,000 ka mga partisipante gikan sa Indonesia, Kenya ug sa Pilipinas.
Nakahibaw na lang si Tumulak nga dunay clinical trial sa Sugbo, homan dunay mga residente sa syudad ang nangutana niya labot sa efficacy sa WestVac vaccine.
Pipila ka mga residente, matod sa konsehal nga naka dawat sa dose niadtong Oktubre 9, ug wa kini hatagi ug vaccination card nga otorisado gikan sa city government.
Ang card nagpakita nga partisipante sila sa study alang sa “recombinant Covid-19 vaccine,” o genetically engineered vaccine.
Sigon pa ni Tumulak nga lakip sa mga na kombinsi nga mosalmot sa clinical trial mga residente sa coastal areas.
Sa iyang bahin, si Dr. Jeffrey Ibones, pangu sa Cebu City Health Department, mipadayag nga gipahibaw unta sila labot sa clinical trial aron malikayan ang kalibog.
“We have been supportive (of) any kind of research because we could not have vaccines without these clinical trials and research. But our simple request is for them to inform the city about it so we can answer queries directed to us,” pasabot ni Dr. Ibones.
(News & photo courtesy of Cebu City Council | Cebu City Health Department | DOH 7)