Usa ka makasubo ug makalilisang nga nahitabo sa pampublikong lubnganan sa Sitio Rotunda, Barangay Cogon, Compostela, Cebu, niadtong Hulyo 19, 2025, sa hapon, human makit-i ang usa ka patay nga bata (fetus) nga gibilin sa sulod sa pulang plastik nga bag.
Sa alas 1:40 sa hapon, nakadawat og tawag si PCpl Charlie Alburo, duty desk officer sa Compostela Police Station, gikan kang Hon. Geraldine Miñoza, konsehal sa barangay, kabahin sa nadiskubrehang fetus sa maong lubnganan.
Miresponde dayon ang mga sakop sa Compostela PNP nga sila PMSg Daryl Rondina, PSSg Francis Hermita, ug PCpl Jessie Boy Lato sakay sa patrol car. Pag-abot sa lugar, ilang nakita ang fetus nga gitabonan og diaper ug gibilin tupad sa usa ka lubnganan.
Base sa pasiunang imbestigasyon, ang pamilya ni Gabriel Yraelo, 21 anyos, taga-Barangay Poblacion, Compostela, mibisita sa lubnganan sa ilang amahan aron managkot. Sa ilang pag-abot, ilang nakit-an ang pulang plastik nga bag ug pagkahuman nila kini gi-ablihan, ilang nadiskubrehan ang fetus nga walay kinabuhi.
Ang pamilya misumbong dayon sa mga opisyal sa barangay, nga misang-at usab og pahibalo sa Compostela PNP ug sa mga tagdumala sa lubnganan aron matagad ang insidente ug mahatagan og disente nga paglubong ang fetus.
Gibana-bana nga anaa pa sa ika-upat ka buwan ang development stage sa fetus. Posibleng kini resulta sa usa ka dili tuyo nga pagmabdos, ug gibilin na lang kini sa lubnganan sa usa ka wala mailhing indibidwal.
Padayon karon ang imbestigasyon sa Compostela Police aron matino kung kinsa ang ginikanan o inahan sa maong fetus.
I via Renante Socia Lada