Usa ka dako nga kalampusan sa kampanya kontra iligal nga drogas ang nakab-ot sa mga otoridad human masakmit ang gibana-banang 1,650 gramos nga gituohang shabu nga nagkantidad og ₱11.2 milyon sa usa ka buy-bust operation sa Barangay Booy, Tagbilaran City, kagabhion sa Hulyo 19, 2025.
Ang operasyon gihimo pasado alas 11:00 sa gabii, pinangulohan sa City Drug Enforcement Team (CDET) sa Tagbilaran City Police Station (TCPS) ubos sa liderato ni PLTCOL John Kareen Oliveros Escober, Chief of Police, uban ang tabang sa Philippine National Police Drug Enforcement Group – Special Operations Unit 7 (PNP DEG-SOU7). Ang operasyon gisugdan ubos sa balidong koordinasyon sa PDEA nga adunay Control Number: 20002-072025-0641.
Nasakmit sa operasyon ang upat ka dagkong heat-sealed transparent plastic sachet nga adunay sulod nga puti nga crystalline substance nga giingong shabu. Kini giila isip usa sa labing dako nga drug seizure sa kasaysayan sa Tagbilaran City.
Gibutyag sa kapulisan nga padayon ang ilang paningkamot aron mapapas ang tanang porma sa iligal nga drogas sa lungsod ug sa lalawigan sa Bohol. Ang suspek sa maong operasyon gipaubos na karon sa proseso sa dokumentasyon ug posibleng pasakaan og kaso nga may kalabutan sa paglapas sa Comprehensive Dangerous Drugs Act of 2002.
I via Renante Socia Lada