Usa ka trahedya ang nahitabo sa bukirang bahin sa Barangay Bagakay, Toledo City, human aksidenteng mibuto ang usa ka “home-made shotgun” o pugakhang nga nagresulta sa kamatayon sa usa ka mag-uuma ug grabeng kadaot sa iyang asawa.
Ang biktima giila nga si Merto Goc-ong, 63 anyos, nga namatay dayon tungod sa samad sa tiyan. Ang iyang asawa nga si Felisa Goc-ong, 68 anyos, kritikal ang kahimtang human maangol sa ulo ug gidala dayon sa Toledo City District Hospital alang sa tambal.
Sumala sa imbestigasyon, nahitabo ang insidente niadtong gabii sa Abril 8, 2026, apan pagka-ugma pa kini na-report sa kapulisan. Base sa pahayag sa asawa, kalit lang mibuto ang armas samtang gi-reload kini sa iyang bana sulod sa ilang balay.
Narekober sa kapulisan ang usa ka kabhang sa 12-gauge shotgun ug duha pa ka bala nga wala pa mabuto. Giingon usab sa asawa nga wala’y lisensya ang ilang armas ug gigamit lamang kini isip panalipod sa ilang kaugalingon tungod sa ilang kahimtangan nga nagpuyo sa hilit nga lugar.
Padayon pa ang imbestigasyon sa kapulisan aron matino ang dugang pang detalye sa maong trahedya.
Source: Toledo City Police Station
I via Renante Socia Lada