Patay na nga mia-abot sa tambalanan ang usa ka 20-anyos nga lalaki human kini nalumos samtang naligo sa sapa sa Sitio Punong, Barangay Ibo, Toledo City niadtong Abril 8, 2026, mga alas 2:00 sa hapon.
Giila ang biktima nga si Daniel Dacillo Lasala, usa ka aircon technician ug residente sa Barangay Lahug, Cebu City.
Base sa imbestigasyon, nakadawat og tawag ang Toledo Police gikan sa staff sa Toledo City General Hospital nga nagreport sa maong insidente. Dali miresponde ang mga pulis ug nagpadayon sa imbestigasyon sa lugar.
Nasayran nga kuyog sa biktima ang iyang mga higala nga nangaligo sa sapa, apan wala pa gipadayag kung pila sila kabuok. Matud sa report, si Lasala miambak sa tubig apan tungod sa kusog nga agos, gituohang naanod siya ug wala na makabalik ibabaw nga bahin.
Nasayran, mga 20 metros gikan sa giambakan nakita ang biktima. Giluwas pa siya sa mga sakop sa City Disaster Risk Reduction and Management Office (CDRRMO) ug gidali dala ngadto sa ospital, apan gideklarar nga dead-on-arrival.
Padayon pa ang imbestigasyon sa kapulisan aron masuta ang tibuok aksidenti. Awhag usab sa kapulisan nga kanunay mag amping kung maligo sa dagat o sa sapa.
Source: Toledo City Police Station