Nadakpan sa hiniusang operasyon sa kapulisan ang usa ka wanted person nga gipasanginlan sa kaso nga homicide ug frustrated homicide niadtong Abril 8, 2026 sa Sitio Daan Baryo, Barangay Carnaza (Island), Daanbantayan.
Ang suspetsado giila lang sa alyas nga “Jiboy,” 59 anyos, usa ka mananagat, minyo, ug residente sa Sitio Pantao, Barangay Carnaza, nadakpan sa Tracker Team sa Daanbantayan Municipal Police Station uban sa koordinasyon sa Tracker Team sa Cawayan Municipal Police Station.
Gipatuman ang pagdakop pinasikad sa Alias Warrant of Arrest alang sa duha ka kaso sa homicide ug usa ka kaso sa frustrated homicide. Gitakda ang piyansa sa ₱40,000 matag usa sa homicide ug ₱24,000 alang sa frustrated homicide.
Human sa operasyon, gidala ang suspetsado ngadto sa Daanbantayan Municipal Police Station sakay og motorized boat aron sa hustong pagproseso sa kaso.
Gidayeg ni PCOL. Abubakar Udang Mangelen Jr., Provincial Director sa Cebu Police Provincial Office, ang maong operasyon ug ang maayong koordinasyon sa mga police units bisan gikan sa lain-laing rehiyon.
Matud pa niya, nagpakita kini sa lig-on nga panaghiusa sa kapulisan aron madakpan ang mga tawo nga nag-atubang og seryosong kaso ug maatubang sila sa hustisya.
Padayon usab ang kapulisan sa pagpalig-on sa ilang manhunt operations batok sa ubang wanted persons isip kabahin sa ilang kampanya sa pagmintinar sa kalinaw ug kahapsay sa probinsya.
Source: CPPO
I via Renante Socia Lada