Padayon nga gipakusgan sa Cebu Provincial Government ang pagbaligya og baratong bugas sa lain-laing lugar sa probinsya, uban sa tabang sa Department of Agriculture (DA), aron masiguro nga igo ug stable ang suplay alang sa mga Cebuano bisan pa sa pagsaka sa presyo sa merkado.
Ang bugas nga gikan sa Planters Products Inc. (PPI) ug Food Terminal Inc. (FTI), lakip ang “Binhi” rice, ginabaligya karon sa ₱48 matag kilo sa mga pampublikong merkado. Apil usab niini ang “Queen Bee Rice,” usa ka klase sa bugas gikan sa Vietnam, nga parehas gihapon og presyo.
Matod ni Gobernador Pamela Baricuatro, nagpadayon ang probinsya sa pakigtambayayong sa national agencies aron mapalig-on ang supply ug mapugngan ang pagsaka sa presyo. Tumong niini nga mapabarato pa ang bugas sa mosunod nga mga semana.
Sa pagkakaron, gipadagan na ang distribusyon sa mga lungsod sa Balamban, Asturias, ug Toledo, ug padayon nga gipadaghan ang stock aron maabot ang tanang lugar sa probinsya.
Source: Cebu Province PIO
I via Renante Socia Lada