Nadakpan sa kapulisan sa Central Visayas ang tulo ka wanted persons sa nagkalain-laing manhunt operation niadtong Marso 17, 2026, isip kabahin sa gipakusog nga kampanya sa Police Regional Office 7 (PRO7) batok sa mga nagtago sa balaod.
Alas 4:20 sa hapon, gidakop sa kapulisan sa Aloguinsan, Cebu ang suspek nga nailhan sa alyas “Arce,” nga Top 2 Most Wanted sa regional level, didto sa Purok Fatima, Barangay Rosario. Ang warrant of arrest gi-isyu ni Judge Joy Bracero Redoble sa RTC Branch 77 sa Carcar City tungod sa kasong murder na walay piyansa. Sa pagdakop, nakuhaan usab ang suspek og wala marehistrong .45 kalibre nga pusil, usa ka magazine, ug tulo ka buhing bala. Gidala siya sa police station ug giandam usab ang kasong paglapas sa RA 10591.
Sa gabii, alas 9:35, gidakop usab sa Tubigon, Bohol ang suspek nga alyas “Bobby,” nga Top 4 Most Wanted sa provincial level. Siya nag-atubang og tulo ka kaso sa statutory rape base sa warrant nga gi-isyu ni Judge May Samson Ariel Chan Cayetuna sa RTC Tagbilaran City, ug walay piyansa ang kaso.
Samtang alas 10:30 sa gabii, nadakpan usab ang suspek nga alyas “Flor,” Top 9 Most Wanted sa provincial level, sa usa ka custodial facility sa Surigao del Sur. Ang warrant gi-isyu ni Judge Judilyn Hugo Tapia-Menchavez sa Family Court RTC Toledo City, Cebu tungod sa kasong acts of lasciviousness ug paglapas sa RA 7610. Gitakda ang piyansa nga ₱180,000 alang sa unang kaso ug ₱80,000 matag usa sa ubang kaso.
Ang tanang nadakpan karon anaa na sa kustodiya sa kapulisan alang sa dokumentasyon ug ipresentar sa korte.
Gidayeg ni Police Brigadier General Redrico A. Maranan, Regional Director sa PRO7, ang mga operatiba ug giingon nga padayon ang ilang paningkamot aron madakpan ang mga wanted. Matod niya, ang matag pagdakop usa ka pahinumdom nga ang hustisya padayon nga gipangita alang sa mga biktima ug ilang pamilya.
Source: PRO7 PIO
I via Renante Socia Lada