Gipadayag ni Gobernador Pamela Baricuatro nga palig-onon sa probinsya ang feeding program aron masulbad ang problema sa malnutrition ug kahuyang sa pagbasa sa mga kabataan sa Cebu.
Matod sa gobernador, dili na siya matingala nga daghang bata ang lisod mobasa ug makasabot sa simple nga mga pulong. Base sa report sa Second Congressional Commission on Education (EDCOM II), giingon nga ang kakulang sa maayong nutrisyon maoy usa sa hinungdan nganong naapektuhan ang pagtuon sa mga estudyante.
Gisuportahan usab kini sa datos sa National Nutrition Council, nga nagpakita nga taas gihapon ang kaso sa malnutrition sa probinsya. Daghang bata ang kulang sa timbang, ubos ang pagtubo, ug adunay problema sa nutrisyon nga makaapekto sa ilang pag-eskwela.
Tungod niini, plano sa probinsya nga maglusad og feeding program sa mga eskwelahan uban sa tabang sa mga pribadong grupo sama sa Century Pacific ug Rise Against Hunger Philippines. Sugdan una kini sa pipila ka eskwelahan ug palapdan kung maayong mapatuman.
Dugang pa, nagtukod usab ang probinsya og bag-ong opisina nga gitawag og Provincial Education Secretariat aron mas mahan-ay ang pagdumala sa mga programa sa edukasyon, lakip na ang nutrisyon ug pagbasa sa mga bata. Tumong niini nga mas matabangan ang mga lugar nga adunay daghang estudyanteng dili pa kahibalo mobasa ug makasabot.
Source: Cebu Province PIO
I via Renante Socia Lada