Cebu City – Nakatala ang Cebu Province ug income nga moabot ug P4.8 billion gikan sa buwan sa Enero hangtud sa Agosto ning tuiga.
Ang data nga gikan sa Provincial Treasurers’s Office nagpakita nga naka kolekta na kini ug 65.53 porsento sa ilang target revenue alang sa tuig 2022.
Gitinguha sa Kapitolyo nga mokita ug dul-an sa P7.4 billion nga income karong tuiga, nga mas taas ug P2 billion itandi sa target nga P5 billion sa tuig 2021.
Matod ni Atty Roy Salubre, Provincial Treasurer nga masaligon kini nga ilang maabot ang target karong tuiga.
“Maka-apas na. Kaya na. Pareha last year, lapas ta gamay, mensahi ni Salubre.
Ang bahin sa Sugbo nga Internal Revenue Allotment (IRA) nagpadayon nga labing dako nga tinubdan sa income nga moabot ug P3.8 billion as of August 22. Naglaum ang probinsya nga maka kolekta ug P5.8 billion nga IRA karong tuiga.
Ang IRA maoy share sa local government nga revenue gikan sa national government.
Nagpabilin ang tax-based revenues nga labing dako nga source sa Sugbo.
Gikan sa buwan sa Enero hangtud sa Agosto, naka kolekta kini ug mokabat P259 million sa tax revenues, dakong pahat niini gikan sa real property tax nga gibana-bananag moabot ug P120 million.
Gawas sa tax revenues, ang Kapitolyo mikita sab ug P149 million nga dividends gikan sa capital o investment receipts, ug P112 million gikan sa regulatory fees.
l via Jhon Tadlip
Source/Photo: Cebu Provincial Capitol, Provincial Treasurer’s Office