Pormal nang gipahibalo ni Governor Pamela S. Baricuatro pinaagi sa Executive Order No. 72, Series of 2025 nga gilibkas na ang suspensyon sa klase ug gisugdan na pag-usab ang klase sa tanang lebel sa mga pampublikong tunghaan sa lalawigan sa Cebu human molabay ang bagyong Tino.
Base sa maong mando, gipahibalo nga ang klase nga nasuspenso sugod pa niadtong Nobyembre 3, 2025 ubos sa Executive Order No. 66 tungod sa hulga sa bagyo, mahimo nang ipadayon human makumpirmar sa Provincial Disaster Risk Reduction and Management Office (PDRRMO) ug sa PAGASA nga nakagawas na sa Philippine Area of Responsibility (PAR) ang bagyong Tino ug wala na kini magdala og hulga sa probinsya.
Matod sa gobernador, stable na ang kahimtang sa panahon sa lalawigan, ug ang mga paspas nga assessment sa mga ahensya nagpakita nga luwas na alang sa mga estudyante, magtutudlo, ug school personnel ang pagbalik sa klase. Ang mga lokal nga pangagamhanan (LGUs) gihangyo nga magpabilin gihapon nga mabinantayon ug magpatuman og localized advisories kon kinahanglan.
Gisugo usab sa gobernador ang DepEd Cebu Province, CHED, ug ang PDRRMO nga magpadayon sa monitoring sa kahimtang sa panahon aron masiguro ang kaluwasan sa tanang magtutungha ug mga empleyado sa eskwelahan.
Ang maong Executive Order epektibo dayon human sa pagpagula niini niadtong Nobyembre 11, 2025, sa Provincial Capitol sa Sugbo.
Source: Cebu Province PIO
I via Renante Socia Lada