Cebu City – Girekomendar sa Department of Education o DepEd 7 nga apilon ang mga schools division sa Cebu Province, Lapu-Lapu City, Carcar City ug Bogo City sa giplanong pilot implementation sa limitadong face-to-face classes sugod sa sunod buwan.
Si Direktor Salustiano Jimenez mitug-an nga iya nang giduso ang listahan sa ilang ulohang buhatan nunot sa pag-uyon ni Presidente Rodrigo Duterte sa pilot implementation.
Ang rekomendasyon sa DepEd 7 naglakip sa school division sa Tagbilaran City ug sa mga lalawigan sa Siquijor ug Bohol.
Sa nasayran, si Presidential Spokesperson Harry Roque mipahibawo nga aprobado na sa presidente ang limited face-to-face classes sa piniling mga lugar sa nasod.
Dinhi sa Central Visayas, 12 sa 19 ka schools divisions ang kabahin sa pilot implementation.
Suma pa ni Jimenez, ang proposal kabahin sa proposal nga gipresentar ni Kalihim Leonor Briones ngadto sa buhatan sa presidente ug sa IATF o Inter-Agency Task Force for the Management of Emerging Infectious Diseases.
Wala pa makatino si Jimenez sa tukmang gidaghanon sa mga tunghaan nga napili nga mohimog face-to-face classes human makasumitir ang matag dibisyon og listahan sa pipila ka eskuylahan. (Jhon Tadlip/JTY)
(Source & photo courtesy of DepEd 7)