Patay ang usa ka 33-anyos nga production worker human madat-ugan og unom ka granite slabs atol sa pag-deliver og mga bato sa Purok Tulay, Barangay Sta. Cruz, Liloan, Cebu, sa kadlawon sa Martes, Hulyo 21.
Ang biktima giila sa kapulisan nga si alyas Saturnino, minyo ug residente sa Sitio Bangko, Barangay Tigib, Argao. Gidala pa siya sa Eversley Childs Sanitarium and General Hospital apan gideklarar nga dead on arrival.
Sumala sa imbestigasyon sa Liloan Municipal Police Station, nag-deliver ang biktima ug iyang mga kauban og 11 ka granite slabs ngadto sa usa ka bunkhouse sa maong barangay.
Nisaka ang biktima sa ibabaw sa canter truck aron tangtangon ang pisi nga naggapos sa mga granite slabs, samtang giablihan sa iyang mga kauban ang side panels sa sakyanan.
Sa kalit, natumba ang mga granite slabs ug natagak ang biktima gikan sa truck. Unom ka granite slabs ang mitagak sa iyang lawas, nga maoy hinungdan sa iyang kamatayon.
Nasuta usab sa kapulisan nga narekord sa CCTV camera sa maong establisyemento ang tibuok hitabo, ug kini nagpakita nga aksidente ang nahitabo. Padayon pa ang imbestigasyon sa kapulisan aron masuta ang tanang kahimtang sa insidente.
I via Renante Socia Lada