Nagpahigayon og panaghisgot ang internasyonal nga non-government organization (NGO) nga Clean Air Asia sa Cebu Provincial Capitol kagahapon aron ipasabut ang epekto sa polusyon sa hangin sa panglawas ug ang kaayohan sa pagpatuman og mas lig-on nga emission standards.
Sumala sa Clean Air Asia, ang ilang organisasyon nagtabang sa mga siyudad, lokal nga panggamhanan ug mga ahensya sa gobyerno sa paghimo og mga polisiya nga nakabase sa siyensya aron maminusan ang polusyon sa hangin ug mapanalipdan ang panglawas sa katawhan.
Matud ni Everlyn Tamayo, Science Lead for Air Quality and Climate Change sa Clean Air Asia, ang polusyon sa hangin dili lamang problema sa mga opisina sa kalikupan, kondili problema sa tanan nga nagaginhawa. Busa, kinahanglan ang kooperasyon sa mga opisyal sa panglawas, mga maghihimo og polisiya, kabatan-onan, mga tigulang ug sa tibuok komunidad aron masulbad kini.
Niadtong Martes sa gabii, nakigpulong usab ang grupo kang Cebu Provincial Piso Health Consultant Dr. Elisse “Nikki” Catalan aron hisgutan ang posibleng mga lugar nga adunay taas nga polusyon sa hangin sa Toledo City ug City of Naga, diin adunay 32 ka mga eskwelahan ug pasilidad sa panglawas.
Gilauman sa Clean Air Asia nga makigtambayayong sa Cebu Provincial Government, Department of Environment and Natural Resources (DENR), ug pribadong sektor aron mapalig-on ang kahibalo sa publiko bahin sa polusyon sa hangin ug mapalambo ang hiniusang mga lakang alang sa mas limpyo nga hangin, mas himsog nga komunidad ug mas moubos nga mga sakit nga may kalabotan sa polusyon.
I via Renante Socia Lada