Usa ka menor de edad nga batang lalaki ang na-rescue sa City Drug Enforcement Unit sa Cebu City Police Office (CCPO) atol sa anti-illegal drug operation niadtong Enero 7, 2026, sa Sitio Semper, Brgy. Carreta, Cebu City.
Sumala sa kapulisan nga gipangulohan ni PCPT Gabriel P. Mota, nasakmitan ang menor og nagkadaiyang pakete sa gituohang shabu nga may gibug-aton nga 30 gramos ug gibanabanang mobalor og ₱204,000. Apil usab sa nakuha ang drug bust money ug usa ka coin purse nga gituohang gigamit isip sudlanan sa drogas.
Ang menor karon anaa sa kustodiya sa CCPO alang sa hustong legal nga proseso. Siya nag-atubang og mga kaso may kalabotan sa pagpamaligya ug paghupot og ginadiling drogas ubos sa RA 9165 o Comprehensive Dangerous Drugs Act of 2002.
Samtang, mipasalig si CCPO Officer-in-Charge PCOL George V. Ylanan nga magpadayon ang kapulisan sa hugot nga kampanya batok iligal nga drogas ug kriminalidad aron mapadayon ang kalinaw ug kahapsay sa dakbayan sa Sugbo.
Source: CCPO
I via Renante Socia Lada