Nagpalig-on sa ilang panagtinabangay ang Police Regional Office 7 (PRO7) ug Department of Education (DepEd) aron masiguro ang kaluwasan sa mga estudyante, magtutudlo, ug mga kawani sa tanang eskwelahan sa Central Visayas. Gipahigayon ang Regional Management Committee (ManCom) Meeting niadtong Hunyo 25, 2026 sa dakbayan sa Mandaue.
Gitambongan sa mga opisyal sa PRO7, DepEd Regional Office VII, ug Schools Division Offices ang maong tigom aron magkahiusa sa mga programa nga makapalig-on sa presensya sa kapulisan sulod ug gawas sa mga eskwelahan. Tumong niini ang pagmintinar sa malinawon ug luwas nga palibot alang sa tanang magtuon.
Lakip sa gihisgutan ang padayon nga pagpatuman sa School Safety Plan ug Oplan Balik Eskwela. Gipasiugda usab ang pagdugang sa police visibility, kampanya batok sa kriminalidad ug ilegal nga drogas, pagpanalipod sa mga kabataan, maayong pagdumala sa trapiko duol sa mga eskwelahan, ug kaandam sa panahon sa emerhensya ug kalamidad.
Matod ni PRO7 Regional Director PBGEN Arnold E. Abad, usa sa ilang labing dakong prayoridad ang kaluwasan sa mga estudyante. Miingon siya nga magpadayon ang PRO7 sa pagtrabaho kauban ang DepEd aron masiguro nga ang matag eskwelahan mahimong luwas nga lugar diin ang mga kabatan-onan makatuon nga walay kahadlok.
Gipasalig sa PRO7 nga ipadayon nila ang lig-on nga pakigtambayayong sa DepEd ug uban pang mga ahensya aron mapalambo pa ang mga programa alang sa seguridad sa mga eskwelahan. Tumong niini nga matag estudyante sa Central Visayas makapadayon sa ilang pag-eskwela sa malinawon, luwas, ug hapsay nga palibot.
I via Renante Socia Lada