Padayon nga gipakusgan sa Cebu Police Provincial Office (CPPO) ang pagpatuman sa Safer Cities Initiative, diin 480 ka tawo ang nadakpan tungod sa nagkalain-laing paglapas sa lokal nga ordinansa atol sa 223 ka police operations nga gihimo sa tibuok probinsiya sa Sugbo kagahapon Hunyo 28, 2026.
Sumala sa CPPO, 339 ka traffic ordinance violators ang nadakpan, 64 ka tawo ang nasikop nga nag-inom og ilimnong makahubog sa pampublikong lugar, 28 ka nanigarilyo sa publiko, 49 ka menor de edad nga nakalapas sa curfew, 13 ka naglaag nga walay sanina sa ibabaw, 2 ka naggamit og karaoke lapas sa gitugot nga oras, ug 2 ka ubang nakalapas sa lokal nga ordinansa.
Sa kinatibuk-an, 339 ka violators ang gipamulta samtang 141 ang gipahimangnoan ug gipagawas subay sa mga ordinansa sa lokal nga kagamhanan.
Nakatigom usab ang operasyon og ₱122,350 nga kantidad sa mga multa. Walay natalang kaso sa vandalism, pagsul-ob og balaclava, ug illegal road obstruction anang adlawa.
Matod ni CPPO Provincial Director PCOL Abubakar Udang Mangelen Jr., ang padayon nga pagpatuman sa mga lokal nga ordinansa makatabang sa pagpalig-on sa disiplina ug pagpugong sa kriminalidad.
Gidasig usab ni Police Regional Office 7 Director PBGEN Arnold Evangelista Abad ang publiko nga magpadayon sa pagtinabangay sa kapulisan aron mapadayon ang kalinaw ug kaluwasan sa komunidad.
Gidayeg usab ni Cebu Governor Pamela S. Baricuatro ang panagtinabangay sa kapulisan, lokal nga kagamhanan ug katawhan sa pagmintinar sa kalinaw ug kahapsay sa probinsiya. Gipasalig sa CPPO nga magpadayon sila sa pagpalig-on sa police visibility ug pagpatuman sa balaod aron mapabiling luwas, malinawon ug organisado ang Sugbo.
I via Renante Socia Lada