Gipasidunggan sa Police Regional Office 7 (PRO7) ang mga pulis nga nagpakita og talagsaong dedikasyon ug maayong serbisyo atol sa Monday Flag Raising ug Awarding Ceremony nga gihimo sa Camp Sergio Osmeña Sr., Cebu City niadtong Hunyo 29, 2026. Ang seremonya nagtumong sa pag-ila sa ilang mga kalampusan sa operasyon, pagpatuman sa balaod, ug sa natad sa sports.
Lakip sa gihatagan og Medalya ng Kadakilaan sila si Police Captain Gabriel P. Mota ug Police Staff Sergeant James G. Sablas sa Police Station 9, Cebu City Police Office.
Gipasidunggan sila tungod sa malampusong buy-bust operation sa Barangay Kalunasan, Cebu City niadtong Mayo 27, 2026, diin nadakpan ang usa ka street-level drug personality ug nakumpiska ang 849.55 ka gramos sa gidudahang shabu nga nagkantidad og kapin ₱5.8 milyon.
Nakadawat usab og Medalya ng Kagalingan sila si Police Major Genesis S. Aniversario ug Police Senior Master Sergeant Edwin G. Illut sa Moalboal Municipal Police Station. Ang ilang hiniusang operasyon sa pagpatuman sa search warrant sa Barangay Lanao, Moalboal niadtong Abril 7, 2026, misangpot sa pagdakop sa usa ka suspetsado ug pagkumpiskar sa usa ka armas ug mga bala.
Samtang, gihatagan og Medalya ng Kasanayan si Police Corporal Kristine Sarah B. Sabunod sa PRO7 Human Resource and Doctrine Development Division human siya nakadaog isip kampeon sa 21-kilometer Female Category sa OceanJet Run 2026 – Cebu Leg niadtong Hunyo 14, 2026 sa City di Mare, Cebu City. Ang iyang kadaugan batok sa dul-an 1,800 ka mga partisipante nagpakita sa disiplina, determinasyon, ug kahimsog sa usa ka pulis.
Matod sa PRO7, ang maong pagpasidungog kabahin sa ilang padayon nga paningkamot sa pagdasig sa mga kapulisan nga magpadayon sa matinud-anon ug propesyonal nga serbisyo. Kini usab nagsuporta sa programa sa Philippine National Police nga naghatag og bili sa maayong performance aron mapalig-on ang pagsalig sa publiko ug mas mapauswag ang serbisyo sa kapulisan sa Central Visayas.
I via Renante Socia Lada