Nagpakita ang Police Regional Office 7 (PRO7) nga usa ka tawag lang sa 911 ang makaluwas na kini og kinabuhi ug makapadali sa hustisya.
Gikan Hunyo 2 hangtod Hulyo 17, 2025, mitubag ang PRO7 sa 126 ka emergency calls pinaagi sa national 911 hotline. Unom sa mga kaso ang mitultol sa pagdakop sa mga suspetsado, samtang 120 ang nasulbad o gipasaka sa barangay aron mahatagan og hustong aksyon.
“These numbers show growing public trust in 911 and the readiness of our personnel to respond swiftly. This supports the directive of our Chief PNP to promote 911 as a trusted emergency lifeline,” segon ni PBGen Redrico A Maranan, Regional Director of PRO7.
Gipahimug-atan ni Maranan nga ang kalampusan kabahin sa modernisasyon nga gisugdan sa Chief PNP nga si PGen Nicolas D. Torre III. Uban niini, nag-upgrade ang PRO7 sa ilang komunikasyon, gigamit ang real-time reporting tools, ug nagpasiugda og mas lig-on nga koordinasyon pinaagi sa bag-ong command center, nga nagtinguha nga makab-ot ang 5 ka minuto nga emergency response time sa rehiyon.
Naglakip sa mga aktuwal nga panghitabo ang pagdakop sa mga suspetsado sa tulisan sa Barangay Pardo sa Cebu City pinaagi sa Police Station 7 uban sa tabang sa guwardya ug mga residente niadtong Hunyo 8. Sa Barangay Mambaling, nadakpan usab sa Police Station 11 ang 69-anyos nga lalaki nga naghulga sa iyang anak gamit ang pistola.
Sa San Fernando, usa ka minor de edad nga nalambigit sa trespassing ang giluwas sa mga pulis sa Barangay Pitalo. Sa Lapu-Lapu City, gipugngan sa mga babayeng pulis sa Station 3 ang usa ka lalaki nga naggunit og kutsilyo ug naghulga sa mga tawo.
Sa Toledo City, usa ka suspetsado nga tulisan ang nadakpan sa Barangay Dumlog nga may dalang armas, gituohang droga, ug kwartang gikan sa pagpangawat. Samtang sa Fuente Osmeña Boulevard, ang paspas nga pagresponde sa Police Station 2 nagresulta sa pagdakop sa laing tulisan.
Padayon nga nagpahimangno ang PRO7 sa publiko nga libre ug 24/7 ang 911, ug kini ang angayang tawagan sa tanang emerhensiya.
Source: PRO7
I via Renante Socia Lada
#rpndykccebu
#675hzamband
#tandemexpress