Sa padayon nga kampanya batok sa kriminalidad, nakasikop ang Police Regional Office 7 (PRO7) og 68 ka mga suspetsado ug nakasakmit og ₱1.78 milyon nga kantidad sa shabu sulod lang sa 24 ka oras nga operasyon gikan Nobyembre 12 hangtod 13, 2025 sa tibuok Central Visayas.
Sa maong operasyon, 40 ka drug suspects ang nadakpan sa 32 anti-drug operations nga nagresulta sa pagkasakmit sa 262.07 gramos nga shabu. Ang Cebu City Police Office (CCPO) ang nakarekord sa pinakadakong kantidad nga 180.28 gramos nga nagkantidad og ₱1,225,768, gisundan sa Cebu Police Provincial Office (CPPO) nga adunay 59.44 gramos nagkantidad og ₱404,192, ug Bohol Police Provincial Office (BPPO) nga adunay 20.95 gramos nagkantidad og ₱142,460. Ang Mandaue City Police Office (MCPO) usab nakatampo sa kalampusan sa operasyon.
Gawas sa drug operations, walo ka tawo ang nadakpan tungod sa iligal nga sugal, ug unom (6) ka iligal nga armas, ang nakumpiskar miresulta sa pagdakop sa lima (5) ka tawo alang sa iligal nga pagpanag-iya og armas. Sa manhunt operations, lima (5) ka Most Wanted Persons ug napulo (10) pa ka laing wanted individuals ang nasikop sa lain-laing dapit sa rehiyon.
Bisan pa sa padayon nga mga kalihokan sa relief ug rehabilitasyon human sa bagyo, nagpabilin nga aktibo ang PRO7 sa pagpanglimpyo batok sa krimen. Gipanghimatuud niini ang dedikasyon ug kaisog sa kapulisan sa pagpanalipod sa katawhan ug pagsiguro sa kalinaw ug seguridad sa Central Visayas.
Sa iyang pamahayag, PRO7 Regional Director PBGEN Redrico A. Maranan mipasidungog sa tanang yunit sa kapulisan sa ilang walay puas nga pagbantay ug pagserbisyo.
Padayon ang PRO7 sa iyang kampanya batok sa drogas, iligal nga sugal, ug ubang krimen uban ang kooperasyon sa ubang ahensya ug katawhan aron maprotektahan ang kalinaw ug seguridad sa Central Visayas.
Source: PRO7 PIO
I via Renante Socia Lada