Gitakdang mubisita sa sunod nga mga semana ang Independent Commission for Infrastructure (ICI) sa Cebu aron mag-imbestigar kung nganong napakyas ang mga flood control projects sa probinsya bisan og dako ang pondo ang gigahin para niini.
Sumala ni ICI special adviser Rodolfo Azurin Jr., tutukan nila ang Central Cebu, lakip ang Cebu City ug Mandaue City, nga mga lugar nga grabe naapektuhan sa baha.
Gisulti ni Azurin nga ang mga opisyal sa Cebu nag-ingon nga muabot sa ₱26 bilyon ang gigamit alang sa mga proyekto sa pagpugong sa baha. Aron masuta ang tinuod nga nahitabo, giingon niya nga ang PNP-Criminal Investigation and Detection Group (CIDG) ug National Bureau of Investigation (NBI) maoy motabang sa pagkuha sa mga dokumento.
Ang pamahayag gihimo ni Azurin human sa High Command Conference sa ICI uban sa mga ahensya sa gobyerno nga nag-imbestigar sa mga anomaliya sa flood control ug infrastructure projects. Lakip sa ilang tan-awon mao ang buhis sa 16 ka dagkong kontraktor nga nakadaug sa daghang proyekto nga gitawag og “ghost projects.”
Sa 421 ka proyekto nga imbestigaran sa ICI ug DPWH, 80 ka proyekto ang ilang giprioridad, mao kini ang mga konektado sa mga kontraktor nga giingon ni President Ferdinand Marcos Jr.
Samtang niini, gibutyag sa ICI nga na-postpone ang pagpakita ni kanhi DPWH Undersecretary Roberto Bernardo sa ilang hearing human mangayo og extension ang iyang abogado. Gilauman nga motungha siya sa Nobyembre 17, 2025.
Ang ICI nagpadayon sa ilang imbestigasyon aron masuta kon asa padulong ang pondo ug kinsa ang kinahanglang manubag sa kapakyasan sa mga flood control project nga gituyo unta aron mapugngan ang pagbaha sa Cebu ug ubang rehiyon.
Source: PNA
I via Renante Socia Lada