Nasakmit sa kapulisan ang 7 kilo nga gituhuang shabu nga nagkantidad og P47.6 milyon ug nadakpan ang usa ka high-value drug suspek atol sa buy-bust operation sa Sitio Ibabao, Barangay Agus, Lapu-Lapu City, sa kadlawon sa Mayo 11, 2025.
Kini ang pinakadakong buy-bust operasyon sa Central Visayas karong buwana.
Ang operasyon gipangulohan sa City Intelligence Unit (CIU), City Drug Enforcement Unit (CDEU), Mobile Patrol Unit sa Lapu-Lapu City Police Office (LCPO), uban sa suporta sa Regional Special Enforcement Team, Regional Intelligence Unit (RIU), Regional Intelligence Division (RID), ug sa Philippine Drug Enforcement Agency Region 7 (PDEA-7).
Nasikop ang 35-anyos nga suspek nga residente sa Purok Calachuche, Barangay Gilotongan, Cordova, Cebu. Nadakpan siya pagkahuman masakmit sa mga otoridad ang mga mosunod: 7 kilo nga shabu, buy-bust money, cellphone, kwarta nga gituhong gikan sa ilegal nga drogas, backpack, ug mga tea bag nga gigamit sa pagtago sa kontrabando.
Gipahigayon ang operasyon alas 1:29 sa kadlawon. Ang suspek karon nagpabiling gitanggong sa CIU custodial facility sa Lapu-Lapu CPO samtang giproseso ang kasong ipasaka batok kaniya.
Gipasidunggan ni Police Brigadier General Redrico A. Maranan, Regional Director sa PRO-7, ang mga operatiba sa ilang kalampusan.
Nag-awhag usab siya sa publiko nga magmatngon ug mosuporta sa anti-drug campaign sa gobyerno pinaagi sa pagreport og mga kadudahang lihok sa ilang lugar.
Source: PRO7-PIO
I via Renante Socia Lada