Kapin sa PhP30 milyon nga kantidad sa ilegal nga drogas ang nasakmit sa awtoridad atol sa mga dagkong operasyon sulod sa 72 ka oras sa Central Visayas. Kini nagresulta sa pagkasikop sa 182 ka mga drug suspek.
Ang agresibong kampanya nga gipahigayon gikan Pebrero 21 hangtod 23, 2025, naglakip sa 163 ka mga operasyon, diin nakumpiska ang 4,423.40 gramos sa shabu nga nagkantidad og PhP30,079,120.00.
Dugang pa, nakasakmit usab ang kapulisan og 4.30 gramos nga uga nga dahon sa marijuana ug 700 ka buok himsog nga marijuana nga tanom nga nagkantidad og PhP140,516.00.
Ang labing dakong nadakpan nahitabo sa Purok 1, Barangay Poblacion, Panglao, Bohol, diin usa ka high-value target ang nasikop nga adunay tulo (3) ka kilo nga shabu nga nagkantidad og PhP20,400,000.00.
Lakip sa narekober nga ebidensya mao ang buy-bust money, usa ka sakyanan, usa ka Colt Combat Commander .45 caliber pistol, usa ka cellphone, ug usa ka backpack nga gipanag-iya sa 34-anyos nga suspetsado. Ang operasyon nahitabo alas-5:28 sa buntag sa Pebrero 23, nga gihimo sa Provincial Drug Enforcement Unit ug Provincial Intelligence Unit sa Bohol Police Provincial Office (BPPO), uban sa Panglao Municipal Police Station ug Philippine Drug Enforcement Agency (PDEA) Bohol.
Gipadayag ni PRO7 Regional Director PBGen Redrico Maranan ang iyang pagpasalamat sa tanang operatiba nga nagmalampuson sa maong operasyon, ug iyang gipasabot ang ilang padayong paningkamot alang sa kasiguruhan sa publiko.
Ang mga otoridad karon nagpatuman og dugang pang imbestigasyon aron matumbok ang gigikanan sa mga ilegal nga drogas ug ang mga nagpaluyong sindikato sa drug supply chain. Gibarugan sa PRO7 ang ilang hugot nga paningkamot sa pagmintinar sa kahapsay ug kasiguruhan sa katawhan, subay sa balaod. (Renante Socia Lada)
(Source: PRO7-PIO)